Wólbernosće

Lubi ludźo,
po dwaceći lětach běchmy jako Wólbernosće zaso raz na jolce! A dyrbimy rjec: Nalada njeje so změniła. Dale widźiš młode a kusk starše wobliča na jewišću a w publikumje, krupjane słodźa a »piwo běži bjez přestaća« …

Lubi hosćo našeho 22. jubileja,

po tutym puću chcemy so Wam – publikumej – z cyłej wutrobu podźakować za krasne dožiwjenje. Połna žurla, wjesołe wobliča, spěw tež z publikuma: To běchu za nas njezapomnite wokomiki. Postrow Přezpólnych bě wězo wosebita překwapjenka za nas. Hólcy: Zapłać Bóh!

Wjace wobrazow wo jubileju namakaće pod rubriku fota.

Wobdźěliło je so cyłkownje dokładnje 50 ludźi z předmjenami wot Z kaž Zdeněk (postrow do Čech!) hač do B kaž Beno a Błažij. Ani Andrej, ani Anka, ani Arcykumpl njeběchu pódla!
Našich swójbnych njejsmy sobu do kłobuka tykli: Sprěnja by jim tam nutřka přewusko było a zdruha smy jim sčasom kartku wobstarali. 😎 Zwostało bě 41 losow.
Běchmy so rozsudźili, zo losujemy po wólbernym modusu 1 ze 44. Tohodla smy tři prózdne lisćiki sobu do teje melony dali. Žane zdaće, što bychmy činili, jeli bychmy tajki zaportk ćahnyli … To pak so Bohu dźakowano njeje stało. Mamy tuž dobyćerku! Wona móže hižo raz te 2,22 € za kartku zeškrabać 😉 Mejlka je po puću do Wěteńcy!
Wulosowali smy wězo tež wulkeho dobyćerja slubjeneje maličkosće. Ta póńdźe do Wotrowa. Hdźe wona přizemi, to zhoniće jutře – runje tak kaž najwoblubowaniši spěw.
Wulki dźak Wam wšěm!

Wšitke kartki su preč! Wšitke kartki? Ně, jenički lisćik so dale spjećuje … Widźi jenički wupuć: Njech los rozsudźi!

Tohodla wulosuje so jutře 22:00 hodź. na našej poslednjej próbje mjez wšitkimi wobdźělnikami naprašowanja za najwoblubowanišim spěwom Wólbernosćow nimo slubjeneje rědkeje maličkosće přidatnje naš poskitk »wólbicard special« (poslednja kartka za 2,22 €).*

*Dobyćer so z mejlku informuje.