Pod Kulowom we holi
- Pod Kulowom we holi, najrjeńši wrjós tam mam.
:,: Mje wutroba boli pak, zo mam šćipać jón sam! :,:
:,: Hdy by tam ze mnu šła, za wrjosom hladała,
to rjeńši by snadź kćěł, ja bych će lubo měł. :,: - Pod Kulowom we holi kće strowa kimjelčka.
:,: Mje wutroba boli pak, zo njejsy ze mnu šła! :,:
:,: Hdy by tam ze mnu šła, za wrjosom hladała,
to rjeńši by snadź kćěł, ja bych će lubo měł. :,: - Pod Kulowom we holi stej’ wrjós zas wysoko.
:,: Mje wutroba boli pak, zo maš nětk druheho. :,:
:,: Sym wrjós wšón zešćipał, zo njeby powědał,
kak lubo sym će měł, hdyž w holi wrjós je kćěł. :,:
Z dychom swjatoh Jana
- Z dychom swjatoh Jana kćeje lubozna,
:,: połna róža rjana, róžow kralowna. :,:
Aj, ty róža najrjeńša, kaž ta moja holička.
Aj, ty róža najrjeńša za te naše holiča!
- Makojca so šěri połna z hordosću,
:,: słabje pak so měri k twojom runjeću. :,: - Nalika so puka z hłójčku šěrokej,
:,: podarmo pak kuka, hač ći runja njej’. :,: - Somotki drje móža pychu dawać sej,
:,: ale kaž ty róža, nihdźe žana njej’. :,: - Połna malwa pyta ze sotru ći być,
:,: podarmo pak spyta tebje dosćahnyć. :,:
Lubka lilija
- Lubka lilija, rjenje zakćěwa.
- Hdyž će njewidźu, ćerpju zrudobu.
- Porno jandźelam tebje přirunam.
- Horjo zacpěwam, hdyž će wokošam.
- Što mi zemja chce, sym-li bjez tebje?
- Bórze wumrěć chcył, njebych tebje měł.
Hdźež so módrja, zelenja
- Hdźež so módrja, zelenja
naše hory, hajnišća.
Hdźež mje strowja zetkujo
w znatym słowje krajenjo.
:,: Tam su moje wjesela,
tam mje ćehnje, tam chcu ja. :,: - Hdźež tam zwony na cyrkwi
lubje rěča k wutrobi,
do wsy hlada z wječorka
pozłoćana cyrkwička:
:,: Tam su moje wjesela … :,: - Hdźež tam rěka pluskoce
přez te hona domowne,
hdźež do hatka, do rěčki
swěća jasne hwězdźički:
:,: Tam su moje wjesela … :,: - Hdźež tam kwětki pisane
pyša łuki domjace,
hdźež tam naše polo je,
žito so tam zmawuje:
:,: Tam su moje wjesela … :,: - Hdźež mje wita narodny
dom a towarš zradowny,
hdźež te znate holiča
k wěncam rutu šćipaja:
:,: Tam su moje wjesela … :,:
